បន្ទាយមានជ័យ៖ ជាបឋមគិតត្រឹមយប់ថ្ងៃទី២៩ ខែធ្នូ ឆ្នាំ២០២២ គ្រោះអគ្គិភ័យឆាបឆេះដ៏ទ្រង់ទ្រាយធំនៅកាស៊ីណូមួយកន្លែងក្នុងទីក្រុងប៉ោយប៉ែត បានបណ្តាលឱ្យមនុស្ស ១៣នាក់បានស្លាប់ និងជាង ៥០នាក់រងរបួស។

ស្នងការដ្ឋាននគរបាលខេត្តបន្ទាយមានជ័យ លោក សិទ្ធិ ឡោះ បានបញ្ជាក់ប្រាប់អង្គភាពសារព័ត៌មាន EAC news នៅយប់ថ្ងៃនេះថា ជាបឋមអាជ្ញាធរបានរកឃើញសាកសពចំនួន ១៣នាក់ ដែលភាគច្រើនជាជនជាតិថៃ និងរងរបួសជាង ៥០នាក់។

បើតាមលោក សិទ្ធិ ឡោះ ភ្លើងមិនទាន់អាចគ្រប់គ្រងបានទាំងស្រុងនៅឡើយទេគិតមកដល់ម៉ោងនេះ ខណៈអាជ្ញាធរនៅតែបន្តស្វះស្វែងរុករកអ្នកដែលនៅជាប់គាំងក្នុងអគារ។

លោកបន្តថាជនរងគ្រោះដែលរងរបួសត្រូវបានបញ្ជូនទៅសង្គ្រោះនៅមន្ទីរពេទ្យក្រុងប៉ោយប៉ែត និងខ្លះទៀតបញ្ជូនទៅមន្ទីរពេទ្យស្រុកអារ័ញ្ញ ហើយសាកសពជនរងគ្រោះជាច្រើននាក់ទៀត ត្រូវបានបញ្ជូនមកតម្កល់ទុកនៅវត្តស្រះត្រាច។

អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គីមកុលមុនី បានបញ្ជាក់ប្រាប់អង្គភាពសារព័ត៌មាន EAC news ថា ក្នុងអគារកាស៊ីណូនោះមានភ្ញៀវមកលេងចំនួន ១ពាន់នាក់ មានបុគ្គលិកបម្រើការចំនួន ៥០០នាក់។

ក្នុងគ្រោះអគ្គិភ័យនេះបានបណ្តាលឱ្យឆេះអគារចំនួន៣ ដែលខូចស្ទើរទាំងស្រុង ដោយផ្តើមឆេះចេញពីអគារក្រុមហ៊ុនកាស៊ីណូ ហ្ក្រេនដាយអឹមិនស៊ីធី នៅខាងត្បូងហើយបន្តឆេះតាមស្ពានរាលឆេះអគារកាស៊ីណូហ្ក្រេនដាយអឹមិនស៊ីធីខាងជើងផ្លូវ ហើយបន្តរាលដាលឆេះអគារក្រុមហ៊ុនកាស៊ីណូប៉ោយប៉ែតស៊ីធីដែលជាប់នៅខាងលិចមួយទៀត។

បើតាមព័ត៌មានបឋម មូលហេតុដែលធ្វើឱ្យអគ្គិភ័យនេះកើតឡើង គឺដោយសារឆ្លងចរន្តអគ្គិសនីយីប៉ាណូជាប់ពីដាននៅអគារជាន់ក្រោមក្រុមហ៊ុនកាស៊ីណូហ្ក្រេនដាយអឹមិនស៊ីធី ដែលមានអគារ ១៧ជាន់ខាងត្បូង៕